英聯不動產董事長郭建波舊年底喺微博同華遠集團總裁任志強打賭，「如果出年三月份中國一線城市樓價不下跌，我會在兩會開幕日喺北京長安街裸奔10公里！」賭約講嘅係今年三月份房價，郭董話要睇埋呢個月先，總之點都唔會縮沙，如果房價繼續升，佢一定會願賭服輸，履行「裸跑」條約！
郭董今次玩到咁大，其實係有原因嘅，事緣舊年佢聽到任總話今年三月內地樓價會升，仲建議取消限購，激到佢生蝦咁跳，話佢呢番不負責任嘅言論，所以立下賭約。雖然任總回應只係講咗句「真夠無聊的！」不過郭董就好認真，做晒功課話內地增速已經放緩，加上限購、限貸等調控政策持續，一線房價將會到頂，結束中國樓市十年上漲周期！
之不過，新年後一線城市樓價都未有下滑趨勢，睇嚟郭董真係要剝光豬「怒跑」北京街頭！難怪佢都做足心理準備，喺微博同粉絲講，「哥在鍛煉身體，隨時準備去京丟臉。贏也是輸，哥不容易。」