證券商協會前主席蔡思聰，行內人都知佢係股壇老行尊蔡陳葆心個仔，鮮為人知嘅原來佢係詠春高手，跟咗冼國林師傅學習詠春有成十年咁耐，最近佢仲進軍埋「大銀幕」，喺冼國林監製嘅新片做「大茄」，但佢自嘲係「細茄」，唯一一句對白最終有冇得留低都唔知！
蔡思聰話同冼國林老友鬼鬼，因此貪得意同其他金融界朋友喺新戲中玩吓，笑說導演雖然話冇cut呢場戲，但老婆睇電影畫頭時，喺呢幕戲中點都搵唔番自己個老公！嗰場戲主要係講打擂台，蔡思聰「飾演」負責擂台敲鐘同收錢嘅「老臨」，仲有一句對白咁多﹕「你做乜嘢？」。佢話自己連「大茄」都唔係，應該係「細茄」！
佢雖然出鏡只得「歷史性」幾秒，但為咗拍呢場，都用咗12粒鐘。話說佢要返佛山拍呢場戲，當日下午四點佢已到片場埋位，行行企企、食吓晚飯咁，直至第二日凌晨四點至可以返回酒店，即刻玩足「半日」。真係慢工出細貨，計絲絲話，喺股票市場搵錢就快好多了！
蔡思聰習武早已有好強底子，以前喺美國讀大學時，已經玩跆拳道、柔道咁，之後再學詠春多年，相信依家佢嘅功夫已好耍家，因此佢得閒時都會幫手教人詠春，將詠春發揚光大。
余詩韻