天然氣及鑽油設備股係過去半年表現最好嘅板塊之一，當市場熱辣辣咁炒頁岩氣概念嘅時候，其實啲油田服務公司都喺度改善緊自身業務。自從巨濤海洋石油（03303）同埋安東油田服務（03337）相繼發盈喜後，Prof. J覺得呢個板塊睇嚟真係被低估咗盈利能力。
安東油服發盈喜，預期截至一二年十二月底止全年業績，期內股東應佔利潤將較一一年同期錄得大幅增長。主要由於公司前期準備充分，而且本年度市場需求強勁，因此收入錄得重大增長。同時，公司採取一系列管理措施有效提升了運營效率，從而利潤水平大幅提升。之前有報告指，安東油服應收帳減值撥備會低於原先預期，睇嚟前後都幾脗合。
行業利潤被嚴重低估
Prof. J嘗試翻查資料，發現竟然無一間大行為巨濤海洋出報告，甚至連預測數字都欠奉。其他市值較大嘅華油能源（01251）同宏華集團（00196）都只係得寥寥幾間行跟進，安東油服已經叫有最多分析員提供盈利預測，但絕大部分都嚴重低估咗公司利潤，可見呢個板塊被忽視嘅程度。
內地政府預期二○二○年前天然氣佔整體能源比例，將由目前4%升至10%。如果內地加快天然氣價格改革步伐，對油田基建服務供應商如安東油服有利。安東油服短線有機會炒業績，帶動股價破頂。不過Prof. J溫馨提示，雖然安東油服亦具頁岩氣概念，但暫時來自呢方面嘅盈利貢獻所佔比例唔係好高。繼續追蹤，出發！
香港大學電子金融服務榮譽助理教授 徐燦傑