大家都知，唔少航運股老總都做過海員，除咗廣為人知嘅中國遠洋（01919）「魏船長」魏家福外，同系嘅中遠國際（00517）董事總經理徐政軍亦都行船行咗十五年，真係乜風浪都見過晒！佢尋日就講開，喺「魏船長」行船遇到海盜騎劫嘅驚險事後，大家都諗咗條好計去阻止啲海盜上船！
方法就係組織防盜班24小時巡邏，而且準備定水喉同啤酒樽去招呼佢哋，咁樣啲海盜就知道唔敢再上中國船喇！徐總話，依家情況好好多喇，船隻去到海盜活躍嘅海域，就會一一排隊等軍艦護送過去，非常安全！
話時話，依家個航運前景仍然「風高浪急」，加入中遠國際只係短短半年多嘅徐總就話，為咗提升公司嘅盈利，已經度定晒發展大計，除咗做大現有業務之外，仲有意要向上下游新業務發展，話唔定今年可以達成兩、三個收購添，所以都需要預備定資金，但唔打算增加派息咁喎！