沽空機構渾水公司（Muddy Waters）喺短短數年內，能令多家中資企業嘅市值合計蒸發逾70億美元。其創辦人Carson Block（渾水哥）最近喺一本著作中，就「公開」咗佢哋成功嘅「秘密」，其實就係「摷垃圾」！
渾水公司專以負面研究報告配合沽空，攻擊中資企業搵錢。佢哋自一○年起家到今日，已令美國上市嘅多家中資企業總共唔見咗成70億美元市值。有睇過佢哋啲研究報告嘅人，對佢哋嘅調查可以咁深入而感到驚訝，甚至會認為佢哋有「內幕消息」，或者秘密渠道，先可以挖到咁多「衰嘢」。
渾水哥近日就喺一本著作入面大爆，佢哋最常用嘅一種「秘密武器」，偏偏就係人人都可以使用嘅：美國證交會（SEC）公共網站。
據佢講，證交會有一班財務專家，會針對上市企業嘅監管申報文件中嘅披露文件是否足夠，而向相關企業嘅高層發信件查詢。
而且呢啲信件全部都係公開畀投資者睇，只係因為呢啲信件一般都「長過阿婆條紮腳布」，大部分投資者都當佢「垃圾」。
偏偏佢有個癖好，就係喺「垃圾堆」入面尋寶，因為呢啲財務專家所問嘅問題，大部分都十分精細同深入。
睇完渾水哥咁講，絲絲忽然諗起中國一句諺語：「勿以物賤而輕之、勿以人小而鄙之」，原來「垃圾」係好有用！
余詩韻