絲絲講場：希慎舞獅留畀租戶點睛
做零售嘅，最緊要旺丁又旺財，新正頭好多商場都舞龍舞獅慶祝農曆新年，希慎興業（00014）尋日都喺利園一期搞咗個醒獅開市儀式，原來佢哋每年都會邀請不同嘅租戶，做點睛嘉賓，睇嚟除咗租約條款可以用嚟冧客之外，呢啲招數都應該冧到租戶喎。
尋日嘅「特別嘉賓」，就係Chanel董事衞鏗同埋宏利人壽行政副總裁兼香港區首席行政總監何達德，主人家就有希慎CEO劉少全同公司嘅高層。
商場新年吸15萬客
公司商舖租務總經理蔡雯慧（Kitty）話，今年零售市道暢旺，希慎旗下嘅商場喺農曆新年期間（8號至14號）總共有逾15萬嘅人次，相信喺咁強勁內地人同本港人消費帶動底下，今年零售市道都好樂觀，預期租金仲有機會繼續升添！
至於寫字樓方面，劉少全就話，公司嘅寫字樓最新續租租金，,平均較上次租約增長三成，目前整體出租率達到91%，撇除希慎廣場，更加係達到98%。佢認為，今年香港GDP有唔錯增長，加埋外圍市況喘定，對今年香港港整體寫字樓市場審慎樂觀。
余詩韻