面對銀保競爭激烈，保險商轉移戰線，另闢新銷售渠道，由平保（02318）董事長馬明哲，連同兩位互聯網巨頭馬雲、馬化騰籌組嘅眾安在線財產保險公司，只差中保監一聲批准就可以啟動啦，據聞呢三位猛人一致推薦百仕達控股（01168）嘅主席歐亞平做董事長。
歐亞平究竟何德何能，獲得商界三位巨頭委以重任？聽講佢為人低調，內地投資界大讚佢膽量十足、投資獨到。除咗名聲勁好，絲絲仲發現歐亞平認識唔少大亨，聽講佢曾經為李超人同埋四叔嘅部分內地業務牽線搭台，人脈咁廣，最重要係佢同馬雲好老友，自然得到賞識。
呢幾年歐亞平確實低調咗好多，絲絲記得佢喺二○○○年初期好活躍，百仕達旗下有兩家上市公司，分別係百江燃氣（01083，現已易手）及威華達（00622），和黃（00013）仲曾經入股百江燃氣，同埋買咗百仕達嘅可換股票據。歐亞平本人，喺○二年仲打入《福布斯》富豪榜。
同歐亞平老友鬼鬼嘅馬雲，呢排動作多多，除咗隻阿里巴巴好快又會喺香港上市之外，聽聞馬雲想發展擔保業務，計劃今年喺中國設立七個金融中心，未來五年仲要申請開銀行，真係百足咁多爪。
余詩韻