絲絲講場：夜期未推人工先漲

雖然中小經紀行舉腳反對「期指夜市」，但港交所（00388）一於好少理，鐵定喺四月八日推出。絲絲聽聞，中小經紀行幾咁憤怒、幾咁無奈都好，都要被迫接受現實，近期急急喺市場上搵人做「夜期」，最少要請兩個人，包括一名負責人員（RO）同一名前台工作人員。由於市場上突然多咗咁多需求，人工自然水漲船高，可能令一直反對「夜期」嘅從業員所始料不及，甚至「喜出望外」！

有證券業人士就講，呢排好多行家的確周圍搵人做夜期，主要係中小經紀行，因為佢哋人手唔夠，要特別請人做「夜期」。相反大行由於資源充足，就唔使特登請人做「夜期」。佢哋仲話依家請個RO，閒閒哋都要兩、三萬元，又未知生意如何，真係「未見官先打三十大板」！

除咗中小經紀行外，絲絲聽聞證監會都要特別請隊人返嚟，監察「夜期」。至於港交所，安排人手當值負責「夜期」，就理所當然。換言之，「夜期」雖然有好多人唔like，但就創造唔少就業機會，都係好事嚟嘅。