內地金融市場嘅穩定性，對環球市場愈嚟愈重要，最近美國雜誌《價值》就羅列一二年度全球前100名最具權威金融界人物。
其中有四位嚟自中國，分別係中銀監主席尚福林、人行行長周小川、中投董事長樓繼偉、工行（01398）董事長姜建清。
尚福林喺四人之中，排得最前，全球排第14位，緊隨其後嘅係周小川，佢擔任央行行長10年，喺政經界嘅口碑，絕對同佢嘅權威性成正比。
排名第27位嘅樓繼偉，雖然一一年中國主權基金嘅全球資產組合虧損咗4.3%，創咗○七年成立以嚟最差業績，但佢同年成功將基金規模擴展到4,820億美元，都唔簡單。
姜建清排名31位，佢最大嘅成績，係將工行發展為全球最大嘅銀行之一，亦都係接替周小川掌管人行嘅熱門人選之一，但最近有消息話佢大熱倒灶。《華爾街日報》近日就分析姜總點解升官無望，原來係因為○九年中央要內銀放水，姜總怕壞帳會反彈，放貸力度細過其他內銀，所以只做到商業審慎目的，達唔到政治要求，而當年放水得最勁嘅中行（03988），其董事長肖鋼依家執掌人行呼聲最高。
余詩韻