孖妹S檔案：「股劃」爸媽示範幫仔女聚財

揀房託 高息兼穩陣

信誠證券聯席董事 張智威（Alvin）

彩兒：你嘅囡囡Cecilia就快一歲，聽講佢出世兩星期，你就買咗份醫療儲蓄保險畀佢，果然係好爸爸！

Alvin： 保險呢啲產品愈早買，保費愈平嘛！遲啲我仲會做埋佢嘅私人基金經理，呢個投資組合會由十萬蚊本金開始，其後我同老婆會不定期投放資金，例如喺股市大跌時，以方便喺投資好時機大手掃平貨。因呢個組合係為小朋友而設，故揀股準則主打「穩健」及「高息」，股票數量約五至六隻就夠，行業亦要分散。

彩兒： 私人基金經理？做你個囡真係好福氣！咁你揀好股票未呀？

Alvin： 我嘅心水股有建行（00939）、置富產業（00778）及陽光房產（00435），貪佢哋業務穩健、高息之餘又派息穩定，我最希望係收足呢啲股票十八年股息，當然我會緊盯市況，適當時機採取「低買高沽」策略。另外，組合內都會買些人民幣及iBond（本港通脹掛鈎債券）。

彩兒：你個投資計劃咁周詳，Cecilia唔使憂喇！

Alvin： 唔係o架，雖然將來我會教佢學投資，但會要佢知道，做金融界未必個個發達，股市亦非容易搵快錢嘅地方，所以我幫佢打理嘅投資組合唔會做投機或短炒，希望佢懂得做人與搵錢都要腳踏實地。

成交旺 港交所睇168

力寶證券聯席董事 陳蓓敏（Kitty）

高妹： 你老公係荷蘭人，咁囡囡咪有荷蘭名囉？今年係佢第一年喺香港過年？

Kitty： 佢叫Teske Alrich，中文名就叫陳雅晴，今年三歲半，八個月大時已經返咗香港住喇，今年係第三年在港過新年。

高妹： 你點睇「利是投資」呢？

Kitty： 我認為幫小朋友做投資計劃是愈早愈好，因為佢哋年紀細，買股票可以採用平均成本法。牛市可買些高增長股票；轉熊市就買些公用股或REITs（房地產信託基金），當然買股票存在風險，家長宜每半年就幫子女檢視投資組合。今年我就睇好港交所（00388），原因是受惠B股轉H股趨勢外，近期港股成交額亦大增，建議家長可於140至145元買入，年底目標價168元；想穩陣啲，盈富基金（02800）或內銀股亦是好選擇。

高妹： 咁小朋友嘅投資組合應如何分配？

Kitty： 我覺得利用七成資金買些增長股，兩成買些保守股，一成用作短炒未嘗不可。當然，如果家長嘅時間唔夠、投資知識有限，最好交畀財金專家負責。家長亦可協助增加投資組合內嘅本金，假設利是錢有3,000蚊，家長可補貼7,000蚊，令本金變成10,000蚊；若來年投資回報有10%，即變成11,000元，咁家長就再補貼9,000蚊，如此類推，幫小朋友嘅「身家」愈滾愈大。

長揸 盈富華夏三百

金利豐證券研究部執行董事 黃德几（Dickie）

彩兒： 眨吓眼，你個大女Aika都兩歲，細仔Arlend都半歲喇，佢哋咁靚仔靚女，今年逗咗幾多利是錢先？

Dickie： 咁我人緣都幾廣，朋友都幾多嘅，粗略估計，佢哋每人都逗咗8,000蚊利是錢o架！現時佢哋一人有一個綜合戶口，除咗儲下每年嘅利是錢外，我亦會每月固定放2,000蚊落去，並由老婆全權負責管理，佢主要幫小朋友做些增值投資咁，例如買些指數基金、藍籌股。講真呀，幫仔女投資，咪即係幫自己儲錢。

彩兒：照你咁講，家長幫小朋友買咩股票最穩陣得嚟，回報率又不俗呢？

Dickie： 如果家長並非從事金融界，又唔可以睇實個股市，其實幫小朋友買盈富基金及華夏滬深三百（03188）就最好喇，兩者屬實物交收之餘，又有股息收，重點係能夠捕捉中港股市嘅升勢，我唔覺得未來十年中國及香港經濟會好差囉！

彩兒： 你投資功力深厚，有無諗住將Aika、Arlend打造成「少女股神」、「少年股神」？

Dickie： 無喎！我覺得金錢觀比投資觀重要，現時好多家長溺愛子女，佢哋話買咩就買咩，難怪有啲小朋友對金錢無實質概念，以為八達通「嘟」一聲就可以有錢！所以我一定會教Aika、Arlend正確的金錢觀，我要佢哋知道錢係用完就無，故要量入為出。

拒風險 買穩健基金

法巴上市衍生產品部主管 郭小菱（Shirley）

高妹： Maya九個月大喇！佢咁靚女，今年實逗咗不少利是錢喇！

Shirley： 其實今年係Maya第二年逗利是，因為舊年佢仲喺我個肚入面時，已經收到不少親戚朋友畀嘅利是。今年大年初一，我幫佢着咗件中式紅色花花外套，等佢去同公公、婆婆拜年，逗番兩封大利是。

高妹： 咁你點幫佢做投資呀？

Shirley： Maya出世無耐，我幫佢去銀行開咗個儲蓄戶口，用嚟儲利是錢；亦買咗份儲蓄保險，類似教育基金，目標供到佢十八歲。依家佢仲細，利是錢有排儲喇，所以唔會做高風險投資，或者等Maya再大啲，先投資啲穩健型基金！

高妹： 你出生於金融世家，實識傳授投資心得畀Maya嘅！

Shirley： 以前屋企真係有一排電腦用嚟睇股市o架！由細到大，媽咪都教我要儲蓄，幾年前我想買架靚車，佢都阻止我，反而叫我去買樓做投資，最終真係賺錢喎。要知道，投資需要本金，而本金唔會從天而降，需要透過持續性定額儲蓄所得，我都會灌輸呢種金錢價值觀畀個囡。

（高妹）（彩兒） 若有料報畀高妹同彩兒或有嘢問，可電郵money.biz@opg.com.hk