Market Insight：翠華控股食正升浪

睇新聞，警方拘捕一名男子，涉嫌在網上散播打壓樓市措施消息。古勝無睇過電郵內容，但農曆年假前，又確見過多間大行研究報告，繪形繪聲去分析傳聞中新五條大辣招對樓市的影響，莫非今次真係空穴來風，齊齊中空寶？

政府連連出招，行政措施壓抑樓價上升速度，buy time等增加供應措施可以「慢慢咁」推出，目標是路人皆見，可惜遠水始終救唔到近火，君可見雙辣招推出四個多月，肯畀15%BSD的買家，居然達620宗之多，地產代理編製樓價指數最近也連升五星期，累積5.3%升幅。

放大圖片

放大圖片

樓市有愈愈升之勢，正如早前推出辣招時估計一樣，SSD 2.0及BSD確實令部分買家卻步，可是大部分樓市投資者，更加唔想換貨後被辣招綁死，結果供應與需求齊齊減少，樓價在低成交下反而因為超低息而繼續上升，可見在一個無匯率彈性及利率調節的地方，政府能夠做的確實係極其有限。

股神押注食品股

股神巴菲特老人家至愛睇得見、摸得到、業務清晰的大眾消費股，好似可口可樂、吉列以至See's Candies都係佢嘅心水。而最近股神夥拍私募基金3G Capital，聯手出價230億美元收購百年老字號，以番茄汁聞名於世的食品巨企亨氏（H. J. Heinz Company）。上亨氏網站，其企業口號：將最簡單平凡的食品，做到非凡出色！又真係幾襯股神一向選股簡單、易明的兩大原則。

唔好以為股神無寶不落，亨氏一定買平，事實以每股72.5美元收購價計，相當於一三年20.5倍預期市盈率，同股神上市旗艦巴郡其實差唔多。亨氏業績無驚人爆炸力（股神甚至準備撤銷上市地位同佢一生一世），着眼的，無疑是長遠盈利能力，今日唔買，明天更貴的心態。

內地食品巨企好似蒙牛（02319）、伊利，無論估值同增長空間，應該都秤先過亨氏，不過一涉及食品安全監察，危機處理等問題，已立即打折扣。可能要到有朝一日，股神唔係買車，而係入股中國食品企業，屆時內地食品安全問題，應該先算達到世界標準。

愈做愈旺有理由

講開又講，本地餐飲股翠華控股（01314）股價愈升愈有，上周五收3.92元，升0.25元，創上市後新高。個人意見，香港高通脹掀起餐飲業加價潮、最低工資立法、以及中產在樓市泡沫中帳面身家上漲feel good，都係走中高檔價錢茶餐路線的翠華，愈做愈旺的原因。

翠華股價升穿掛牌後第一個浪頂3.48元，技術上進入無阻力區。但從基本因素去睇，一三年預期市盈率35.6倍，點講都係有點貴，能否繼續交出35%以上的年增長，支撐高估值，是翠華後市的一大疑問。之不過，眼見大家樂（00341）同大快活（00052）一三年PE都去到24.9及15.9倍，高於歷史平均值，市場反應似乎告訴大家，唔使幾耐我哋要食到80蚊一個焗豬扒飯，或者40蚊個下午茶餐。

信義係時候翻炒

上周市場傳出兩會期間將有新的利好股市措施出台，堅定流就要等着瞧，但一眾城鎮化概念股上周五又再翻炒，水泥、玻璃等建材股做好。

其中，信義玻璃（00868）股價創五十二周新高5.73元，由於主營的玻璃業務今年有望重納上升周期，而受惠光伏業氣氛改善，今年分拆相關業務上市一事或有新進展，年內股價有望打破悶局，下一較大阻力在6至6.2元水平。

古勝