艾肯（Carl Icahn）同比爾‧阿克曼（Bill Ackman）呢對美國對沖基金界冤家又再次包拗頸，一直睇淡美國保健產品直銷商康寶萊（Herbalife）嘅阿克曼，舊年12月就大手沽空康寶萊，空倉高達10億美元，估唔到佢嘅死對頭艾肯喺「情人節」以2.14億美元買入康寶萊，股價再次被炒上，當日收市即升近兩成半！絲絲睇嚟佢兩個真係水溝油，勢要同對方對着幹！
今次開火緣於美國對沖基金經理阿克曼舊年批評康寶萊向低利潤分銷商推銷嘅手法，又話公司會捱唔住，仲沽空公司股票，搞到康寶萊即刻反駁，話佢誤導投資者！
而艾肯就睇準呢個打擊阿克曼嘅機會，揚言康寶萊嘅營運模式可信，認為公司業績被低估，並且揀喺二月十四日情人節大手吸納近13%股權，送份大禮畀阿克曼。
兩個華爾街巨富其實早喺○四年就因為一單交易對簿公堂，從此結怨，艾肯就曾經狠狠咁話，「就算成個地球得番你（阿克曼）一個，我都唔會同你一齊投資！」而阿克曼亦反駁艾肯誠信破產，只係識得向小投資者攞着數！今次佢哋因為康寶莢再次擦槍，肯定有好戲睇。