絲絲講場：Tiffany告Costco賣冒牌貨

雖然價錢貴咗少少，不過絲絲相信「Tiffany」呢個金漆招牌，一定能夠打動另一半嘅心，早排網上有標榜「Tiffany出品」嘅訂婚戒指，價錢平一截，聽講唔少男士買咗打算向另一半求婚。直至情人節當日，Tiffany & Co.入稟告上市公司Costco賣假貨，呢件事先爆煲！

品牌珠寶商Tiffany講到明，從來無授權或參與任何有關Costco所出售嘅戒指嘅設計，為咗保障消費者，同埋公司利益，情人節當日入稟法庭，告Costco侵權、假冒、不公平競爭、損害其商譽等，仲禁止對方再賣假訂婚戒指，最後點少得索償公司較早前嘅銷售損失。

講到損失，Tiffany嘅損失又點及買咗A貨訂婚戒指咁大呢？絲絲嘅好朋友早兩日仲拎住隻訂婚戒指晒命，尋日知道呢個消息，真係嬲到震，睇怕佢都唔會輕易放過佢個未婚夫！

不過，今次真係估佢唔到，大家點會諗到全世界最大嘅連鎖會員制批發公司都會捲入賣假嘢？大家最多咪當有平貨執，點知到頭來得個桔，隨時要拎多一倍錢買隻真戒指，求多次婚！