內地「家電下鄉」政策啱啱喺一月份結束，依家由新一輪嘅節能補貼政策補上，Prof. J覺得呢次政策改變對電視生產商嚟講可謂影響有限，尤其係對依家有差唔多有260款電視符合節能標準嘅TCL多媒體（01070）。
TCL多媒體係補貼名單數量最多嘅一間內地家電生產商，上年內銷同出口電視銷售分別錄得20%同16%增長，合共155萬部。
過去兩年，集團嘅高端LED電視銷售增長分別達46%及82%。隨着內地嘅高清廣播普及率上升，加上3D及大力催谷嘅雲電視，如無意外會成為集團嘅新主打產品。
今時今日電視機同智能手機已經唔再係日本同南韓品牌嘅專利，國產品牌一樣可以走出中國，面向世界。
TCL多媒體係最早一批衝出中國嘅品牌之一，最近同荷里活電影公司，以及漫畫商Marvel合作，將全球最大嘅全高清3D液晶顯示屏，放喺《鐵甲奇俠3》電影中Iron Man嘅屋企入面，進行植入式廣告。
集團之前都有同其他荷里活電影搞聯合推廣，亦非常成功咁打造更國際化同年輕化形象，擴大品牌國際影響力。
Prof. J睇內地家電行業今年會出現周期性復甦，家電相關股份普遍都會做好，而其中TCL多媒體業務係「雙龍出海」：出口及內銷並行，業務上能夠分散市場風險。最近市場上有唔少分析員都調高集團今年毛利率同銷售預測，股價亦見突破，建議可以中線逢回吐收集。繼續追蹤，出發！
香港大學電子金融服務榮譽助理教授 徐燦傑