雖然環球股市興旺，但每周流入債券基金的銀紙仍以數十億美元計，擁躉不少。不過，King Sir早前聽到一番盛世危言，「債券天王」富斯（Dan Fuss）話在五十五年事業生涯中，未見過美債如此超買；鄧普頓的明星級債券基金經理哈森斯塔（Michael Hasenstab），亦呼籲大家遠離看似安全的主權債券，早走早着，十足會由天堂變地獄。
佢哋講來講去就係怕聯儲局減少買債及加息，為何這兩招有災難後果？大家經常聽到話債券價格與市場利率走向相反，原因好簡單，債券在發行時派息率已定好，因而被稱為「固定收益」工具。當市場利息上升，債券派息率已固定咗無得變，惟有靠債券跌價令基數降低，變相增加派息率補數。
哈森斯塔管理資產達660億美元，絕非講笑，直言如果不是聯儲局掃貨，美國國債孳息肯定比現在高好多。他自爆已坐言起行，例如買入一些年期較短的韓國國債，基金的有效存續期少過兩年，比同行的五至六年短好多。
縮短持有的債券年期，真的安全嗎？為何不索性全身而退？無他，既然打正招牌做債券基金，不可能沒有債券！自保方法是揸短債，受市場利率影響較低。道理同樣簡單，以三年期債券為例，收完第一年利息，等於袋咗總收益三分之一；相反，十年期債券收完第一年利息，仍然有十分之九收益未到手，受市場利率影響大得多。
現在買債券，確實要想一想。不過，這些明星令King Sir想起債券大王格羅斯，兩年前亦曾獨排眾議話美債必敗，並且大減倉，結果美債價格繼續升，債王差不多跑輸全行，要公開承認睇錯市。
債市泡沫人人都知，到底幾時先會爆？好似每個人都一定會死，只是不知幾時，最怕債市未變地獄，睇錯市已經要落地獄。
ECON King Sir