呢幾年各國猛咁印銀紙，絲絲喺香港完全感受到「通脹猛於虎」嘅威力，聽聞今年利是錢都加入通脹行列之一，真係有人歡喜有人愁，即係要封利是畀人嗰啲就要更大手筆，收利是嘅就會更加興奮。
近期銀行已開始為大家提供換新鈔服務，絲絲同幾個做中小型銀行嘅銀行家傾偈，佢哋話今年50蚊新鈔需求大咗好多，差啲唔夠換畀客，因為啲客話利是都通脹，要由20蚊紙升上去50蚊紙，成本即刻大唔止一倍。
其實以往50蚊紙一向都係最難換，今年利是通脹就令到情況更嚴重，銀行家回想以前做過發鈔行，當時梗係唔憂唔夠貨，依家就要拿拿聲去發鈔行拎貨再換畀客。
絲絲記得上年係拉埋天窗嘅好年，唔少新人都會喺蛇年加入派利是行列，加上龍年亦都比較多龍B出世，今年利是「流轉量」應該幾驚人，照道理避年嘅新人可能都會增加。
另一方面，絲絲有仲未結婚嘅朋友，直言喺「利是餡」倍數通脹下，厚住面皮問要老友拎利是嘅誘因都會大啲。