觀瀾湖一向都鍾意打破健力士世界紀錄，除咗創下「世界第一大高爾夫球會」之外，喺海口亦創出「世界第一大溫泉水療度假區」。上個月佢哋又搵咗近二千名球僮，舉起紅、白色嘅傘，砌出一個巨型人體QR Code（二維碼）嚟推廣可持續旅遊，只要對住巨型QR Code一scan就會進入觀瀾湖嘅可持續旅遊專題網頁。絲絲聽聞佢哋專登搵球童參與呢次活動，係想傳遞一種「人人參與」嘅理念，向全體員工灌輸環保概念。
絲絲知道觀瀾湖高爾夫球場灌溉用嘅水，全部都係嚟自雨水收集系統、污水處理廠同人工濕地排水系統嘅再生水。為咗節省能源，佢哋仲喺深圳嘅酒店、會所同海口觀瀾湖合共安裝近二萬盞LED燈，同喺東莞觀瀾湖安裝風能太陽能混合路燈，積極使用可再生能源。
而為咗令遊客一齊響應低碳運動，園內提供超過二千架電瓶球車，避免使用汽油以及為園區帶嚟碳排放。觀瀾湖仲為客人提供無紙化「一卡通」服務，盡量減少酒店裏面一次性消費品嘅使用，咁落力宣揚環保，認真抵讚，唔怪之得舊年佢哋成為「全國低碳旅遊示範區」之一啦！