打工仔最緊張加薪同埋職場環境，絲絲尋日聽完招聘顧問公司Robert Half發表嘅招聘調查，發現唔少金融服務企業都對業務增長前景感到樂觀，有33%銀行及金融行業嘅高級領袖表示今年會增聘人手，而商貿行業更有39%財務總監同董事話會請多啲人添，一眾金融界打工仔應該放心晒啦！
調查公司合共訪問咗300位駐港金融服務業高級領袖、財務總監、財務董事，不論工商行業定金融服務業都有超過八成受訪者表示，對今年公司增長前景有信心，超過三分一企業會增加員工數目，只有5%金融服務企業同2%商貿企業計劃縮減人手。
調查亦發現會計同財務技能嘅專才需求最大，其次為風險管理、業務發展同法規。而會計亦被商貿領袖認為係最難請到人才嘅職位，可見會計人士有大把機會！
調查公司又預期外圍經濟改善，企業對優質人才嘅競爭會持續，超過九成受訪者都話擔心一三年會流失表現最優秀嘅員工。所以佢提醒企業請人嗰陣，要留意人工以外嘅誘因，例如事業發展藍圖、工作同生活平衡嘅承諾咁，先可以吸引同挽留人才。絲絲覺得佢實在講中晒香港所有打工仔嘅心聲，工作咁辛苦除咗為麵包，當然仲要有質素嘅生活啦！