期指觀瀾：淡友勢強未肯收手
意西債息急升，歐債危機舊調重彈，畀芬佬在連升七個月的港股，計數離場藉口，尋日恒指由頭跌到尾，最低曾見過23,104點，收市下跌536點，報23,148點，出現四日連跌之外，一心想係今浪21,098至23,944點的0.236，即23,273點會是調整的最低消費，估唔到一日可以超額完成，或多或少是因為中石化（00386）大折讓批股被芬佬鬧爆，天時地利的配合。
十二月四日至今，足足兩個月時間，恒指未曾試過低於10日移動平均線（昨在23,624點）收市，一直擔心確認跌穿會有較大調整出現，真係好嘅唔靈醜嘅靈，上星期五即市跌穿收市拗腰收復失地，證實不過是引好友以為超短線整固完畢的走勢陷阱，無奈由恒指期權馬鞍式長倉換入期指好倉，要止蝕離場。
或下試50日線
昨日恒指留低23,406至23,637點的下跌裂口，由昨日現貨沽空比升至一個月新高的10.44%，以及二月期指成交達9.49萬張的轉倉後新高可見，淡友蓄勢以待的一擊，未必會咁短癮，以0.382回吐支持在22,857點，與50日線22,878點頗接近，淡友食住條水，有機會先隊多幾百點先肯回頭。
John Mullen