Market Insight：定向批股遺禍深遠

意、西國債孳息急升，由前晚歐、美，到昨日亞洲股市均呈骨牌式的下跌，點數跌幅大之外，尋日港股沽空佔成交比升至10.4%，升跌股份21對79，兩個數字都也是月內之最，今浪係真跌，抑或短期調整，看官不宜太早下定論，但可以肯定今次是近兩個月以來，淡友至義無反顧出擊的一次。

內銀股跌得全面，四大行跌幅介乎2.5至3.8%，而近日升幅唔細的民生銀行（01988），跌幅5.8%，碰啱古勝剛提議大家換貨，把三分一注碼沽掉手上二三線炒股，換入內銀股，尋日看官可能已鬧爆。

放大圖片

放大圖片

大孖沙減磅沽內銀

古勝唔係想解畫，事實昨日是近兩個月升市中，出現較大調整的一日，近日二三線炒風稍斂，大孖沙減磅揀「球來球往」，成交有足夠深度的內銀套現，實屬正常，試想如果後市要跌多一千幾百點，向22,000至22,500點走，揸內銀股，抑或隨時成交縮到有入無出的「曱甴屋」蚊型炒股？你又會點揀。

而中石化（00386）批股，唔多唔少影響到尋日港股嘅氣氛。古勝以為李寧（02331）聯袂私募基金，發零息可換股債券為名，變相低價供股順便自己低價包銷為實，已經睇到眼火爆，估唔到一山還有一山高。中石化透過高盛，以定向批股的方式，向唔超過十名人士配售28.45億股H股，每股作價8.45元，涉及240億元，比前日收市大幅折讓9.5%。

舊有股東成受害者

以中石化尋日收市價8.74元，意味舊有投資者因為消息單日帳面損失6.4%。反之，這不多於十個的圍內人士，接貨一日享受3.4%嘅帳面利潤，即賺8.25億元。尋日聽到有芬佬鬧爆，試過問配售行要貨，當然最後一股都無。

市值七千多億的大藍籌中石化，真係攞槍指住個頭都唔信，要淪落到折讓9.5%批股先有人肯接貨。若非善忘，幾日前高盛才把手上10億美元或78億港元的工行（01398）公開配售，最後反應熱烈，超額近四倍，埋單較市價折讓3%。相比之下，中石化「豪」畀十個幸運兒，唔選擇公開配售嘗試收窄折讓，集資額少了，最後令舊有股東成為受害者！

缸邊消息，今次接貨包括中資機構，身為香港上市公司，中石化是港股基金及強積金組合必揸股份之一，如果要派糖比社保基金甚至中金，那就不應吝嗇，應該一視同仁益吓本地強積金吧。

經過昨日，古勝已分唔出，到底李寧同中石化有乜分別，這類不利小股東的分餅仔活動，今次唔係第一次，相信也不會是最後一次，兩個半月前港交所（00388）為收購倫敦金屬交易所找數，以市價折讓5.45%，每股118元批股集資77.5億元，之後股價絕塵輾轉升至150.7元（之後當然無見過股價118元），當時與今次情況一樣，機構投資者一股難求，77.5億元新股，僅僅由六個大孖沙獨吞，或者這種情況在A股十分常見，不過長此落去，恐怕紐倫港的金融中心地位，遲早玩完。

避險板塊跑贏大市

雖然尋日恒指跌超過2%，但仍然可以搵到逆市奇葩，獲重大合同嘅中國南車（01766），股價上升4%，連帶同系嘅南車時代（03898）同升逾4%，另同屬鐵路相關股份的中鐵建（01186）上晝有大手上板，股價亦報升3%。

看來長假前資金流入避險板塊，短線公用、基建、國策類股份有望跑贏大市。

古勝