滬綜指連漲六個交易日，昨升9點，報2,428點，深成指偏軟跌59點，報9,760點，兩市成交增至2,627億元人民幣，其中滬市成交更創十一個月新高，煤炭、銀行及有色金屬股齊齊踩油。相比之下，港股就有山雨欲來之勢，恒指開高後一度升逾200點，但高位再衝無力，升幅係咁縮，後段仲要由升轉跌，單日轉向唔多好睇。
中港兩地股市同氣連枝，較自由的香港股市去年年中率先反彈，A股要到年尾才有起色，依家A股氣勢續勁，港股會否先行調整，機會唔細，最好假前定個止賺。
唔算熱門的浙江世寶（01057）去年十一月才回歸A股市場，當時正值A股最低潮期。因市況及各種因素，發行規模只有1,500萬股，其中525萬股是公眾配發，供應少得可憐，結果公開配發的中簽率只有0.13%，發行價2.58元人民幣。昨日H股股價2.79元，A股股價則是15.74元人民幣，是目前同在兩地上市AH股當中溢價最大的一隻，原因是A股貨源太少。
當去年股份回歸A股兼瘋炒之際，H股反應唔算太強烈，反而到今年初才突破2.6元。浙江世寶從事設計、製造汽車轉向器及相關元件，早前發盈警料去年盈利跌30.89%至37.1%，但盈警後股價反升，相信是因內地汽車業今年復甦，有利公司重見增長動力，且在AH股之中，此股市值細細粒，計入盈警後市盈率約7至8倍。股價早前從3元樓上開始調整，近日喘穩，可低撈。
一飛