回顧龍年，要數表現突出嘅港股板塊，一定要提房地產信託基金（REITs）。其中置富產業信託（00778）單位價格喺舊年已經升咗六成，如果計埋全年每基金單位分派收益，就真正係「財息兼收」了。
早排置富公布截去上年底止嘅全年業績，淨物業收益按年增22.8%至7.883億元，可供分派收益按年增24.2%至5.495億元。公司話今年旗下商場加租幅度會參考通脹，咁即係收入起碼會追通脹先啦。而喺管理物業方面亦令人很滿意，去年物業同期出租率為97.7%，而剩低嗰2%左右係因為仲有部分物業裝修緊，暫時未可以租出去住。
置富咁強勁嘅業績主要受惠於佢整體物業組合租金嘅強勁增長。增長嘅一部分係來自本身現有嘅物業，幫佢推行資產增值措施後（即係翻新工程），為公司帶來10.4%物業收入淨額增長；而新收購物業──麗城薈同和富薈帶來咗額外收入則佔增長剩低嘅12.4%。
Prof. J提提大家，置富嘅新物業項目喺一二年其實只係貢獻咗10.5個月，但已經有咁好成績，相信喺一三年，貢獻足12個月後，增長應該更加有睇頭。
眨下眼，今年就係置富成立十周年，公司財務狀況穩健，喺上年又買入咗兩個新商場，而公司市值亦超過咗10億美金。呢個里程碑對公司嚟講真係可喜可賀，因為10億美金係一個分水嶺，跨過呢個門檻就可以開放畀更多有興趣嘅機構投資者去投資，對公司股價起到正面作用。繼續追蹤，出發！
香港大學電子金融服務榮譽助理教授 徐燦傑