港交所（00388）上市科主管狄勤思上禮拜五宣布提早四個月離職，即時有傳聞話狄勤思已泊到「好碼頭」，稍後會過檔財務匯報局，接替即將約滿嘅甘博文做行政總裁。
雖然呢個係市場傳聞，但睇番個安排，又真係有迹可尋。本來狄勤思喺今年七月至正式離任，但佢同港交所就雙方協議提早四個月，至今年三月一日離職。而甘博文就咁橋，喺今年三月底約滿財匯局，佢早前已公告天下話唔再續約。因此時間上真係好脗合。
咁大家梗有疑問，狄勤思使唔使「過冷河」呢？有熟悉監管機構運作人士就話，狄勤思又唔係去港交所嘅對手到做；亦唔係立即去被港交所監管嘅上市公司到「搵真銀」，只係去另一個監管機構，所以應該冇乜問題。
其實狄勤思今年先得六十歲，仲係好後生，最緊要係擁有超豐富嘅監管機構經驗，絕對係「好搶手」。
狄勤思咁熟上市監管，若果最終真係加入財匯局，加埋財匯局新任主席潘祖明，財匯局勢必成為強勢監管機構，爭取會計監管更多權力，會計師公會可能要諗吓計了！