卓百德（Peter Churchouse）出名係「樓神」，凡親要評論樓市政策變化，絲絲都諗起佢。佢嚟自新西蘭，為咗入鄉隨俗，趁住農曆新年拋低個水晶球，化身堪輿學家講流年市況。識咗Peter咁耐，絲絲尋日第一次收到佢公司出嘅賀年卡，除咗封面有條蛇外，最驚喜莫過於內版模仿通勝，預測蛇年五行板塊運程嘅設計，真係有新年氣氛！
佢以Portwood Capital董事總經理及Asia Hard Assets Report出版人嘅身份，寄出咗賀年卡，卡面冇乜特別，但有「餡」o架，畀咗唔少投資貼士呢！呢份署名Peter同囝囝Tama嘅曆書話，火同水呢兩股能量會交替主導金融市場走勢，雖然波幅未必有二○一一年咁大，但要注意投資組合防守性，切記揸夠cash，咪喺牛市初期得意忘形，因為金融市場會先升後跌，尤其喺西曆六、七月之後要多加提防。
屬水嘅行業蛇年行正大運，金融、旅遊、交通都會利好；建築、基建、工程同埋採礦石呢啲屬土嘅板塊走勢都唔差。相比之下，Peter兩父子估紡織品、時裝、紙業及藥業屬木，表現只會麻麻，屬金嘅行業成績最差。講咗咁耐，「樓神」臨尾不忘補番句話樓市升勢會放緩，叫絲絲畀啲耐性咁話喎。