臨近農曆新年，星展香港率先有喜事。尋日絲絲同朋友一齊到賀，現場仲有調酒師贈興，究竟有咩喜慶？之唔係位於廣東道100號嘅星展豐盛理財中心開幕囉！新分行仲係星展香港嘅第一間樓上舖。絲絲即時有興趣想知道星展緣何要「上樓」，照道理喺廣東道呢啲旺區點都會揀地舖先！
對於第一次「上樓」，星展香港豐盛理財及分行網絡業務主管鍾少權（Derek）就話，皆因尖沙咀嘅地舖租金比樓上舖貴成3、4倍，係「上樓」嘅考慮之一。絲絲亦覺得幾有道理，話明係理財中心，「上樓」可以慳番一大截租金，符合理財原則。
至於新舖有乜特別？星展董事總經理兼零售銀行業務總監潘燕明（Pearlyn）都有出席，佢話新分行嘅設計配合Canton100嘅海景，裝修有飛機艙嘅意味，真係幾有心思喎！
依家星展香港有36間分行，大部分都係自置嘅物業，其中有29間係豐盛理財中心，有4間優化咗做Gallery Branch，採用咗新加坡旗艦店室內設計特色，尋日開幕嘅分行就係其中一間喇，Pearlyn話優化計劃將會擴展到其他分行。
Derek話，呢次搬舖係星展5年優化財富管理網絡嘅其中一環。唔只室內設計特別，Canton100分行有一樣新玩意，令Derek玩得不亦樂乎，估吓係咩？竟然係一部數鈔機！Derek用一疊8,880元鈔票示範，原來部數鈔機識得將雜亂嘅鈔票按金額排序，佢話部機係星展香港獨有o架！遲啲新分行都會安裝，想睇嘅朋友就要留意啦！