CNN早前嘅一二年最吸引人物排名榜，雅虎行政總裁邁耶（Marissa Mayer）排行第九，可見呢位靚媽CEO嘅魅力真係沒法擋。不過絲絲收到風，雖然雅虎大部分員工都勁like呢位女CEO，但亦有小部分員工幾唔鍾意佢，仲用匿名E-mail力數邁耶3宗罪。
嗰位員工投訴，邁耶掌舵之後，次次開會都例牌遲成一個鐘先到，從未試過一次準時。佢仲話，邁耶好似以為世界上淨係得佢自己嘅時間先係寶貴咁，其他同事都好唔滿意邁耶呢個壞習慣。除咗遲大到之外，E-mail入面又話，邁耶上任之後只重視公司嘅軟件工程師，其他部門嘅同事就好似唔存在咁，做到好無癮咁話。嗰位員工最後仲話邁耶請錯人返嚟做高層，個COO、CMO、同HR個阿頭確實係聰明醒目，但講到同人合作就唔多識，兼冇人情味。
封E-mail對邁耶嘅指控唔係老作，連前雅虎員工都話，雅虎入面有兩大陣營：一派力撐邁耶，另一派就唔多like佢。唔多like佢嘅員工，都好認同封E-mail所講，仲話邁耶重用嘅都係之前佢由Google帶過嚟嘅人，搞到原本一直喺雅虎嘅舊人無晒地位。
絲絲認為，雖然反對邁耶嘅只係少數，但係員工對行政總裁嘅睇法出現兩極化絕對唔係好事。希望邁耶可以做啲嘢，減少班員工嘅怨氣。