講起舊年內地家電零售業嘅風雲人物，絲絲第一個諗起嘅，唔係蘇寧電器嘅張近東，而係靠幾條微博成功掀起行業價格大戰嘅京東商城CEO劉強東。
《財富》（中文版）尋日宣布由劉強東當選一二年度中國商人，仲讚佢由一個普通職工到依家有成3萬個員工，公司銷售額都由幾千萬升至一百億美元，但係一路堅持承諾，喺保證質量嘅同時提供最低嘅價格，呢種品格喺今日中國企業家中已經係「鳳毛麟角」。
《財富》○二年首次推出中國商人報道到依家，已有十幾個中國企業家入選，好似海爾張瑞敏、聯想柳傳志、阿里巴巴馬雲等，粒粒都係內地商界巨星。
今次劉強東當選，除咗因為京東舊年年收入超過400億人仔，已經成為規模僅次於阿里巴巴嘅第二大在線商城外，更加重要嘅係佢喺公司創立八年來，一路樂於堅守「又平又好」嘅承諾，而且每年都會親自送一次速遞，體驗手下配送人員嘅艱辛。