被美國總統奧巴馬提名為下任財長嘅白宮幕僚長傑克盧（Jack Lew），繼佢嘅連續畫圓圈、十足十「鬼畫符」咁嘅親筆簽名周三被外界彈話睇唔明之後，連奧巴馬都忍唔住要踩多腳。
話說奧巴馬喺白宮宣布提名傑克盧接任蓋特納成為美國第七十六任財長嘅時候，喺群眾面前講笑咁話，其實佢咁耐以嚟都無為意傑克盧個簽名係點嘅，直至傳媒日前廣泛報道後，佢曾諗過「縮沙」唔提名傑克盧，即刻全場大笑。
其實又唔怪得人笑傑克盧嘅，話晒財長嘅簽名會印喺美鈔上面o架嘛。嗱，仲未完，奧巴馬隨即仲補句，話傑克盧應承咗佢，如果通過確認程序嘅話，會努力起碼寫番一隻大家睇得明嘅字母，免得拖累美元貶值咁話。
其實，唔知係咪「物以類聚」，同傑克盧多年老友嘅蓋特納，咁啱以前都係簽名有如畫符。傑克盧喺記者會上，仲同企隔籬嘅蓋特納講話本來自以為好了解佢，點知喺日前至知大家原來喺書法上同樣有困難。計絲絲話，事實擺在眼前，做高官係唔需要寫得一手好字嘅。