係人都知政府係港交所嘅單一大股東，揸住5.88%股權，尋日坊間突然傳出話港交所多咗個第二大股東，事緣港交所嘅披露權益資料顯示，貝萊德喺一月七號，增持144萬股港交所，令到佢嘅好倉持股量由4.89%，增加到5.02%，持股量僅次於政府。不過，事隔一日，事情又峰迴路轉，貝萊德喺一月八號又再減持140萬股，令到好倉持股量又由5.02%，降番到落4.89%。
港交所同證監會都唔評論呢單嘢。有市場人士就話，貝萊德做咁多ETF業務，持股量有變化，冇乜特別！以往德銀等投行，喺港交所持股量也曾試過超過5%。
不過，本港法例規定，除咗證監會批准外，任何人士都唔能夠成為港交所嘅「次要控制人」，即係有權行使港交所5%或以上投票權。
證監會至今已批出8個實體成為「次要控制人」，因為佢哋係代客戶託管股份。
港交所去年十一月底配股集資10億美元收購LME，除咗政府出嚟認頭話有認購外，啲股份落咗喺邊個手上，一直都係個謎。所以港交所股權一有乜嘢風吹草動，市場都特別敏感。
余詩韻