隨着A股表現回勇，香港上市嘅A股交易所買賣基金（ETF）也一樣表現省鏡。喺廿幾三十隻A股ETF入面，Prof. J對舊年發行上市嘅易方達中一百（03100/83100）特別有印象。
首先作為一隻以人民幣計價嘅實物A股ETF，易方達中一百已經有一定吸引力。佢嘅ETF先透過「人民幣合格境外機構投資者」（RQFII）將境外嘅人民幣帶返內地直接買A股，然後再推出港元交易櫃枱，成為一隻「雙幣股」。好處係不論投資者揸住人民幣定港元，只要係對A股市場有興趣，佢都受你玩，令到隻ETF規模愈滾愈大。
ETF規模大小有咩影響呢？規模大啲對易方達同投資者都有着數。因為易方達嘅基金經理林生分享過，將心比己，佢哋易方達嘅宗旨係盡量控制費用比率喺1%以下，務求令隻ETF嘅追蹤誤差縮減到最細，而投資者又唔使負擔太貴嘅成本。呢一點係Prof. J非常之欣賞，需知道一隻ETF主要係靠基金經理費、託管人/受託人費用等維生，如果要嚴格控制成本，真係只可以由規模同交易成本等方面入手。
Prof. J另外亦比較鐘意佢追蹤緊嘅中證100指數，因為係由滬深300指數中規模最大嘅100隻股票組成。市場上有啲追蹤300、亦有追蹤50，分別喺邊呢？數目較少會變相比較集中喺某啲行業，譬如金融、保險等，而數目多啲就可以將資金分散喺唔同行業上，而100隻啱啱唔太少又唔太多，符合中庸之道。繼續追蹤，出發！
香港大學電子金融服務榮譽助理教授 徐燦傑