近日細價股又再起動，風光再現，印證魚缸變化多端，金占士尋日同老友飲早茶，佢就提醒啲後輩要記住，花無百日紅呀！
個市咁旺，何解咁感慨？聽埋老友講古仔就明喇。
話說細價股每年都有禾雀亂飛嘅時間，香港市場有幾個知名嘅細價股玩家，賺到盆滿缽滿，點知上個月，傳出有著名玩家唔多掂，有傳佢畀人cut credit line，連老婆都有資產畀銀行封咗，搞到佢要同另一位老牌莊家兼放數人度水，認真慘情。
呢位玩家響中環無人不識，玩細價向上炒同向下炒都搵到大錢，高峰期有成十幾隻細價股由佢幫莊，最終傳出股場失利，一時間周轉唔到要拖數。
傳聞佢有幾隻殼股，都要向市場兜售，又搵過專門幫人買賣殼嘅投資者求救，不過人哋好多貨喺手，所以無睬到佢。
老友話，其實呢位玩家過去十年真係一帆風順，佢同某上市公司老細好鬼老友，兄弟班一齊搵食，甚至幫呢位老細揚名海外，後來呢位老細自己沉船，玩家都好叻無上到身，點知一時間都周轉不靈。如果佢過到呢一關，加上近期個市翻生，話唔定已經轉危為安。
金占士