娃哈哈集團董事長宗慶后有兩大特徵——慳家兼勤力。佢每日使費只係幾百蚊，食嘅都只係家常小菜，佢一日做16個鐘，仲形容自己好似雍正皇帝一樣咁勤奮！
年屆67歲嘅宗慶后話，佢每日過住朝7晚11嘅生活，唔係作息，而係每日工作16個鐘，對絲絲嚟講簡直係地獄生活！除此之外，每年仲要出國考察洽談大約3個月，又要去全國各地做市場調查5個月，難怪連佢嘅下屬都會依賴佢！不過佢自己就好似好享受呢種生活，出差嗰陣仲會趁機睇歷史劇放鬆一下。宗慶后話自己嘅偶像係雍正，因為喺佢眼中雍正勤勉專制，又識理財，仲話自己好似佢添！
跟過佢打工嘅員工，閒閒哋都可以數出一大堆證明佢辦事「上心」嘅例子。面對內地飲品業市場瞬息萬變，宗慶后唔敢怠慢，不斷研發新產品，好似健康保健飲品、紅酒、功能性飲料等等。為咗投入新挑戰，佢不但自己做功課，仲走訪各地市場了解年輕消費者嘅市場，佢話「只有脗合需求先能賣得好」！
宗慶后留意到內地「三高人群」多，即係高血壓、高血糖同高血脂嘅人，所以特登投入大量資金研發菌種，製作預防三高嘅飲料，當中嘅生物工程技術仲可以用喺污水處理同垃圾處理等行業！而為咗染指紅酒市場，本身唔好杯中物嘅佢都拜讀《世界頂級葡萄酒及酒莊全書》、《世界葡萄酒全書》等專業著作進行研究，真係好認真o架！