周大福（01929）嘅珠寶拍賣會就快又嚟，今年繼續由榮譽主席鄭裕彤嫡孫、執行董事鄭志剛（Adrain）操刀，概念就由舊年嘅法國mood到今年嘅意大利feel，同樣係由Adrain提供意念同珠寶設計，絲絲就先睹為快去試戴咗兩條重頭首飾。
Adrain同絲絲講，今次佢嘅意念係嚟自意大利米蘭個著名購物商場，話說Adrain之前去當地旅行，抬頭望咗個商場嘅彩玻璃圓拱屋頂，突然靈感湧現，個系列叫做「OMBRE DI MILANO系列（Shadows of Milan）」，每件首飾都有一對「靈魂之眼」。
兩位「主角」一紅一藍，紅色叫「赤紅飛行」，象徵火鶴，鑲有紅寶、桃紅、粉紅剛玉，展現夕陽雲彩漸變層次。藍色嗰條叫「湛藍躍墜」，靈感嚟自虎鯨，鑲咗極罕有嘅星光藍寶、礫背蛋白石及藏青藍寶。兩條都好襯絲絲高貴典雅嘅氣質，拍得住套首飾嘅專用模特兒孔令令o架，個廣告遲啲出街，大家就可以聯想到絲絲嘅風采嘞。
Adrain唔肯透露佢心目中嘅底價，不過舊年個拍賣會，拍賣12套首飾估值就超過3,000萬元，仲好大手筆請埋近200名年消費過百萬嘅中港VIP去法國旅行，就算投唔到，都會去周大福嘅中港舖頭幫襯。
余詩韻