投資同做人一樣，都要向前看。一間公司喺過去嘅時間做得唔好，又唔代表佢以後無運行嘅。最重要係班管理層願意為公司搵新空間同亮點去爆。近排有唔少上市公司都有新搞作，而且市場反應都幾正面，當中Prof. J覺得弘海（00065）幾值得留意。
弘海主要從事製銷塑料編織袋同塑料桶，而近年亦涉足埋煤炭銷售生意，公司截至一二年六月底止，中期虧損785萬元。不過，早排公司股價走勢凌厲，原來公司已簽訂合作備忘錄，夥拍大連船舶興建褐煤提質廠。大連船舶就係之前完成改裝航空母艦嘅造船公司，主要喺中國從事海上、陸用、民用嘅鍋爐同壓力容器產品設計建造同安裝。
要興建一間年產量不少於200萬噸嘅褐煤提質廠房，需資約4億元，對於弘海嚟講，不論係前期嘅資金投放，還是建造技術都帶嚟一定壓力。今次同大連船舶以項目管理承包嘅形式合作，借助佢哋嘅優勢，弘海就可以一舉紓緩呢兩方面嘅壓力，加快公司喺褐煤提質業務嘅發展。
另一方面，大連船舶肯咁抵得諗，承擔建廠費用，亦反映出佢哋對呢個項目好有信心。弘海市值約10億元，據講開展煤加工業務後，如果一切順利，可為公司每年盈利帶嚟大躍進，股價隨時翻幾番。公司股價自去年十一月起突然發力，由0.75元彈上最高1.2元，現高位整固。Prof. J覺得如果唔跌穿1.1元，都仲有機會再上。繼續追蹤，出發！
香港大學電子金融服務榮譽助理教授 徐燦傑