新一年新開始，各間大行都為今年經濟把脈，其中星展香港經濟研究部高級經濟師梁兆基（Chris）更相信，一三年將會係中國精彩嘅一年，仲大膽估計阿爺可能放寬「一孩政策」咁話喎。
內地城市化來勢洶洶，Chris認為城市化應該會揀啲人口唔係咁老嘅地方推行，佢仲話內地靠出口同投資嚟帶起經濟呢條路，已經再行唔通，惟有靠內需，而放寬「一孩政策」就對刺激消費有好大幫助。
放寬「一孩政策」點有助刺激消費？Chris話，如果父母得一個細路，即係將來只得一個仔女可以依靠，所以父母唔會亂使錢；而當個細路大個咗，一個人就要照顧兩個老人家，同樣唔會使錢。
講開使錢，Chris又大嘆中港兩地買嘢樣樣貴，特別係有咗細路就更加感受到，佢話絲絲仲後生，未有咁快感受到。既然今年係精彩嘅一年，Chris話自己會擺多啲時間研究城市化，嚟緊會出一本書講中國。本書幾時有得賣？暫時賣個關子吧。
余詩韻