打工仔嘅新年願望當然係加人工，多啲福利就更好。大除夕嗰晚，有個叫「恒信楊誠成」嘅人發微博，誠徵總裁助理一名，年薪50萬元人民幣，仲有一套豪宅、一輛寶馬、一部鑽石手機作為獎勵，睇到絲絲眼都凸埋。唔止，呢位楊總裁仲話明，開工第一日，佢會親自揸車接送呢位總裁助理返工放工。有誠意到極！
條件咁吸引，招聘要求又點先？楊總裁講明要有碩士以上學歷；28至40歲之間；有5年行業工作經驗；執行、溝通、協調能力強；團隊意識強；洞察力敏銳；受聘者更要同楊總裁簽5年合同。
能夠開出咁嘅條件嚟請一個幫到手嘅助理，呢一位楊誠成本身又係乜背景？
聽講佢係一個內地80後，由14歲起就靠自己雙手出嚟打拚，完全唔係富二代。依家佢間公司主要從事房地產、現代農業、有機食品生產、超市連鎖、旅遊產業開發，喺遂寧、南充、綿陽、青海都有產業。
楊誠成開出嘅條件筍成咁，難免惹人懷疑，但佢再三聲明自己絕對唔係開玩笑、唔係惡搞、亦唔係炒作，佢話只係「思賢若渴」，真心想搵一位有真功夫嘅助理，所以先發招聘微博。大家有無興趣試吓？
余詩韻