絲絲講場：永嘉高管變身潮人

話說絲絲嗰日撞到永嘉CFO張智（Wilson），平時官仔骨骨嘅佢，當日一身西裝褸襯牛仔褲，令人眼前一亮！

Wilson話，自從公司入股D-mop後，D-mop旗下嘅品牌變成大家嘅dress code，即使去見banker都係咁着，冇咁死板之外，仲幫公司做埋流動廣告，一舉兩得！

入股D-mop着埋上身

講開又講，永嘉其實八年前已經開始做零售業務，所以Wilson對管理D-mop好有信心，仲已經有開拓中港市場嘅發展大計添。

不過佢話D-mop個品牌矜貴，唔想開到周街都係，反而會主力開多啲自己品牌嘅店舖，好似Blues Heroes同埋Loveis，價錢相對較大眾化。

內地店開一間賺一間

內地方面，佢話繼續會開Y-3，因為開一間賺一間咁話，亦會嘗試引入D-mop。絲絲眼見，依家有唔少上市服飾公司喺內地仲要「艱苦經營」，睇嚟永嘉除咗遠見外，唔可以缺嘅仲有耐性。

余詩韻