Market Insight：雨潤食品炒味漸濃

去年十月內地黃金周，本地零售市道差勁，勢估唔到十一月內地無長假期，香港零售業總銷貨值365億元，按年升9.5%，比分析員預期4.2%勁一倍有多，確係柳暗花明。統計處話，十一月零售市道優於十月，主要受惠於勞工市場穩定，及訪港旅客人數急升所致。

昨日一眾珠寶股被大行唱好勁升，莫非春江水暖？同一情況也發生在梳打埠，去年十二月澳門博彩收益282.45億澳門元，創去年單月新高，按年升19.6%，數字勝預期，幾隻大型濠賭股統統破位。

放大圖片

放大圖片

基金追逐落後股

每次升市，通常由一線靚股行先，像領匯（00823）及香港地產股去年上半年威風八面，到二輪升浪，資金揀基本因素不錯的股份，好似去年中的內房股就係最佳例子。到近日升市，已進入全新階段，資金唔再同你睇PE、PEG等基本因素，專搵夠低夠殘，PB愈低愈好的埋手，君可見高估值高增長的康師傅（00322），因為資金換貨被質低，股價跌到四個月低位。

每次大市升勢維持一段時間之後，曾經被當成垃圾的低市帳率股份通常都可以威一陣，當然，他們咁平一定有本身問題，短期行業可以復甦當然最好，唔得亦唔緊要，總之炒一轉，公布業績前散水無傷大雅。近期推介過的中信泰富（00267）、馬鋼（00323）、以及國美電器（00493），市帳率介乎0.5至0.7倍，業務有見底迹象，近兩日見股價坐火箭一樣飆升。

有份摩通報告列晒股價遠低於去年高位，市帳率又低的股票，有機會在一月份基金追逐風險資產中跑出，包括中海發展（01138）、熔盛（01101）、鞍鋼（00347）、國美、中信泰富、中鋁（02600）、保利協鑫（03800）及雨潤食品（01068）。

經過三年不景氣，航運股基數細但嫌行得慢，幾隻金屬股唔錯，較睇唔通係雨潤，去年七月開始生豬價回升，只要保住毛利率不跌，復甦應可預見。最近股東大會通過向大股東大規模採購生豬，這類關連交易本應令人有戒心，但股價近期表現卻是另一個故事，昨日大成交急升，如果升穿6.35元，過去半年的雙頂阻力，或者可作投機性跟進。

中集集團（02039）B轉H之後愈升愈有，自boxing day後一直停牌的萬科B，自然勾起基金無限憧憬，高掛免戰牌關係，勢估唔到愛屋及烏，連萬科隻殼股南聯地產（01036）都單日暴升22.3%。

今時今日，要投資內地企業，基金可以透過QFII直接參與A股，外管局亦毫不吝嗇，不斷派QFII額度，未來兩年估計每年起碼三至四百億美元，怕餵唔飽你班基金佬。曾幾何時，B股是海外投資者投資內地的渠道，惟歷史任務已完成，唔少深圳B股一日成交唔夠百萬元人仔，轉場嚟過只係遲早問題，但經中集一役，唔少B股已經乾升，再炒水位唔多。

內房選擇勝在多

講番萬科，揸逾七成南聯，每股成本約5.6元，乜都未做，單炒注資消息經已賺兩個開，早前已講過，受上市條例所限，兩年內若果注資規模超過南聯資產一倍，便當成重新IPO論，難度大增，但依家炒到癲晒，唔會唔趁高以溢價批股，再以較大折讓注資教小股東就範？

牌面玩法似向着這方向發展，不過都係嗰句，既然坊間咁多內房可揀，何必要搵隻咁複雜兼咁多變數攞嚟煩呢。

指數升到呢啲水平，唔少股份股價已經迭創52周高位，資金開始轉移視線至落後股。近日見到落後股陸續起動，好似古勝最近品評過嘅國美一口氣踢穿1元關，昨以全日高位1.06元收市，升逾一成；思捷（00330）亦升4%，收報11.6元。

在盈警股之中繼續尋寶，發現昨日就連熔盛以及恒盛地產（00845）亦有郁動，若然真係去到唔「醜」唔炒嘅地步，相信呢對孖寶炒上條件十分「優厚」﹗

古勝