孖妹S檔案：同門高手互訴財情

外國學府派：芝大取「經」金融路笑看風雲

彩兒：芝加哥大學係名牌大學，出名難入又難讀！

妍：相對其他名牌大學，芝大並非特別難入，是由於各系學生都要修讀其核心課程，每月要閱讀經典文學並寫下報告，因而嚇退不少當地學生，對不少港人學生也甚為吃力！我當時心想：不少經典文學如柏拉圖的讀物，人們或要用一輩子閱讀，有乜理由我們可以用短短數周內完成相關論文！現在回看雖然也感辛苦，但不失為一個很好的學習機會，可訓練寫作技巧外，還能培養廣闊思維！

黃：當時每周要讀一百頁文學巨著，的確可琢磨寫作技巧！現在我經常要寫文章，時不時也會引經據典！

彩兒：芝大經濟學系名人輩出，你們會前往他們的課堂朝聖？

黃：我有特別選修Robert Lucas（諾貝爾經濟學獎得主）的「經濟學入門」。因是入門課程的關係，他主要講述一些簡單理論，或分享其研究過程及成果。

彩兒：Stephen喺九六年畢業，Rita則於○二年畢業，當時攞住「芝大經濟學系畢業生」名銜搵工，係咪特別響噹噹？

妍：我覺得會有優勢呀！雖然○二年經濟氣候不佳，但我曾於美資投行做過暑期實習生，所以早於○一年已得到該公司的offer（聘用），免除搵工煩惱！

黃：其實每年的經濟環境都唔同，我於九六年畢業，但當時搵工甚為困難，加上我想周圍讀吓書，所以去耶魯大學讀多一年碩士課程，九七年先投身雷曼兄弟作分析員！

彩兒：投行際遇易受經濟環境影響，當時你哋嘅仕途如何？

黃：九七年亞洲正值金融風暴，但紐約市場並未受到太大影響，僅有「Emerging market crisis」（新興市場危機）的意識，不過九八年LTCM（長期資本管理公司）在俄羅斯投資債券失利的衝擊則甚為巨大，因LTCM一旦倒下，好多投行也會冧檔，最後要由聯儲局出手救市，終令當地金融市場復甦。直到○一年科網股爆破，美國經濟大受影響，我便申請調離紐約，移至倫敦分行工作。

妍：○二年畢業後我在香港的美資投行工作，點知○三年爆發沙士，大大影響公司生意！但我剛出嚟做事，最重要係累積經驗，所以我申請調至新加坡分公司工作兩年。幸好早前的金融危機（○八年金融海嘯除外）較為地區性，只要申請調至其他地域，便能減低所受影響。

彩兒：我上網查看，發現芝大的學費已升至近六萬美元一年，好貴呢！

黃：當時學費冇依家咁貴，約為三萬美元一年！

妍：連埋生活費的話，就大概三十萬港元一年，但我當時攞到獎學金，學費問題不大！

妍：美資投行執行董事妍宇（Rita）

黃：中文大學全球政治經濟社會科學碩士課程客席講師黃元山（Stephen）

放大圖片

放大圖片

本地學府派：賓主變書友 商管活學活用

高妹：張老闆（恒豐證券董事總經理張華峰）經常出入立法會，忙到唔得閒同我哋飲茶，但我哋都搵咗Simon一起回想當年的同窗趣事！

林：當年一齊上堂的日子好開心o架，雖然老闆好忙，但我哋都冇乜試過走堂！

高妹：EMBA有唔少功課及報告，你們怎應付？

林：我們大多會分工合作完成Project（企劃），通常我會負責資料搜集及研究，而老闆就會做Presentation（匯報），因老闆的身形夠分量，可以壓場呀嘛！眾多功課當中，最深刻就係北京首都機場的研究！我們主要分析機場的營運成效，當時為咗測試機場人員的危機處理能力，我哋仲專登請人去搞事，有人扮唔識講中文，有人更大吵大鬧，我哋更差點兒被當地公安誤以為法輪功成員呀！

高妹：金融界不乏危機，你哋可以活學活用呢！

林：咁又係呀，股票場上變化萬千，證券行更涉及大量資金的往來，難免會出現不少緊急狀況，相當考驗各員工的應變能力。縱使課堂上的知識係紙上談兵，但各同學的處理方法有異，實可擴闊了我們的視野及思維，對管理證券行有莫大幫助！

高妹：你哋由賓主變成同學關係，實有好多趣事啦！

林：哈哈，我開頭未習慣的時候，經常在學校都仲會稱呼對方做「老闆」，後來先至慢慢改口叫「Chris」（張老闆的英文名）咋！整個課程的最大挑戰係一些有關網絡資訊的學習，這是一個全新的領域，我們需要多下苦功才能趕上進度！不過，正因如此，我哋依家對科技產品可以好快上手，我同老闆已時時用「WhatsApp」聯絡喇！

高妹：咁我下次搵老闆要「WhatsApp」佢先得！

林：恒豐證券研究部董事林家亨（Simon）

中學校友：理科出身 大學醉心研炒股

彩兒：數數手指，中學生已是十年前的身份了！（講笑）你們在那些年時有冇「錯過」大家呀？

蘇：我當時仲未識Sonija呀！

李：但我認得師兄（Daniel）你呀，你當時有份搞學生會，屬活躍分子呢！

彩兒：你哋兩個都投身金融界，會否早於中學時期已修讀金融相關的學科？

蘇：我以前讀理科，只在會考時讀過會計咋！我當時仲未諗過將來會投身哪個行業，所以在大學選科時會以興趣行先，揀選港大的認知科學，主要是一門探究人腦及心智的學科。

李：（搶問）吓，咁你第一份工作係咩呀？

蘇：我畢業過後就喺康宏售賣基金，由於冇金融相關學位，所以咪拿拿臨考CFA（特許財務分析師），及後便轉做金融分析員！

李：哦，我都係修讀理科，僅在會考時讀過經濟，後來因為Pure Maths（純數）的成績甚佳，因而揀選一些與數學相關學科，並入讀了港大的經濟與金融學系。

彩兒：咁你哋有冇喺中學階段炒股呀？

蘇：冇呀，但當時因科網股熱潮，身邊有同學認購tom.com，從而得知股票市場，但只是一知半解，及後要到大學二年級才開始留意股票，因為當時恒指在沙士過後，從8,000點爆升上來，刺激我想研究金融股票喇！

李：我也是到了大學時期才開始接觸股票，因市場進入牛市階段，隻隻IPO都勁升，咪開始幫屋企人抽新股而開始投資股市！

蘇：新鴻基金融證券策略師蘇沛豐（Daniel）

李：時富金融服務集團首席策略師李韻儀（Sonija）

高妹、彩兒

若有料報畀高妹同彩兒或有嘢問，可電郵money.biz@opg.com.hk