海通國際（00665）尋日宣布陳志安辭任執行董事，明年一月一日就生效。
絲絲即刻打畀Derek（陳志安洋名），事關佢係當年大福證券老臣子，做到○九年併入海通之後仲係集團台柱，估唔到兩年交接期一過就要走嘞，明年原來佢會同老友兼同事Terry（朱逸鵬）另起爐灶。
絲絲搵到Derek，佢唔肯講太多，因為佢仲喺「冷河期」，依家趁假期「hea」吓，享受吓家庭生活。
但其實行內好多人都知，佢同Terry已經成立咗間金融公司，叫做「鎧盛資本有限公司」，呢個月六日已經正式獲證監會發牌，就機構融資提供意見，Derek話間新舖明年先至正式運作。
Derek佢喺金融界已經打滾咗近廿年，九六年就入咗大福，主管企業融資部，每逢大福保薦新股上市，或者大福公布業績就會見到佢上鏡。
而佢嘅老友Terry就係海通國際資本嘅執行董事，兩個人都好熟企業融資，明年將會正式開門搵刁。