現年八十一歲嘅電能實業（00006）老臣子曹棨森宣布即將於元旦日榮休，不過佢老人家始終心繫公司，之後仲會擔任非執董、副主席同埋高級顧問職務。絲絲仲知道，一向以勤力而備受稱道嘅曹Sir，直到尋日仍然準時返工，可謂打工一族嘅典範。
曹棨森早於六六年已加入香港電燈（電能實業前稱），手執土木工程理學士證書嘅佢，當時出任工程建設科總工程師，直至八一年加入國際城市集團出任執董，再於八七年跳到現時東家和黃（00013）出任地產董事總經理。
咁啱和黃八五年收購港燈，曹Sir輾轉於九七年同港燈再續前緣，並任集團董事總經理至今。
服務公司超過三十年，仲一手一腳湊到公司國際化，曹Sir自然深得長和系主席李超人倚重，絲絲仲記得佢上年嫁女，超人兩父子都親臨會場到賀，足見其江湖地位。
至於新任董事總經理，將由尹志田接手，尹生同曹Sir出身其實都幾似，同樣係電能老臣子之一，七八年就加入公司，同時亦手執工程師資格，十年前仲擔任過澳洲聯營公司CEO。