絲絲講場：星展親子活動夠甜蜜

絲絲聽講，所有星展員工都可帶同子女一齊參加，等子女了解吓父母平時嘅工作，以及銀行嘅運作，話唔定仲可以引起子女對做「銀行家」的興趣喎！不過，計絲絲話，要畀小朋友知道父母平時搵錢艱難至真！

活動當日，除咗要學分真假銀紙，小朋友仲可以着住星展制服大玩角色扮演（role play），既可以體驗前線工作，幫客戶入錢，仲可以喺後勤（back office）接聽電話，幫客戶解決「失卡」問題添！絲絲收到風，Janet仲帶埋囡囡一齊玩，唔知係咪想囡囡第時都做銀行家（banker）呢？

據講，當日星展擺滿兒童遊戲區，當中包括有六米卡通跳彈床、親子競技遊戲，以及魔術表演等，有得學又有得玩，唔怪之得小朋友笑逐顏開啦！