港交所（00388）成功收購倫敦金屬交易所，正要大展拳腳之際，點知呢個時候有高層將要離開團隊，佢就係上任只有半年嘅集團財務總監馬超（Stephen Marzo）嘞。不過數數吓，今次已經係行政總裁李小加加盟港交所以嚟，集團第三次轉換「掌櫃」，莫非出面真係咁多好路數？
馬超喺今年六月先至上任港交所財務總監，估唔到做咗幾個月就「劈炮」，公告就話，馬生同董事會無咩拗撬，港交所仲好感謝馬生嘅貢獻，祝願佢日後工作順利添。馬生咁快唔撈，絲絲都想搵港交所嘅發言人了解多少少，不過發言人就無咩補充嘞。
會計界人士就話，港交所掌櫃個位依家都唔易做o架，事關上市公司財務總監負責控制成本，依家個市麻麻地，港交所嘅收入跌咗，財務總監都要諗諗計控制成本；加埋港交所收購倫金所，財務總監嘅重擔自然又多咗，壓力都唔細o架。
港交所稍後會成立委員會搵人替補財務總監個位，暫時由副財務總監鄺有成署理住先。其實前財務總監詹德慈喺一○年三月底離開港交所之後，鄺有成都曾署理過一段時間，相信港交所嘅財務工作唔會受好大影響嘅！