金融徐筆:雅居樂隨時再發圍

睇番二○一二年,內房股普遍都升咗六、七成。除咗受惠於市場銷售回暖同整體股價嚴重超賣外,亦因為市場對於明年樓市睇法正面。踏入年尾,市場資金追落後,有啲優質內房股,如雅居樂(03383)等都上番一年高位。

雖然雅居樂今年頭10個月合約銷售額只相等於全年目標75%,但佢嘅合約銷售面積,頭11個月已達全年目標逾九成。銷售額同面積嘅差別係因為早段跟隨同業減價所影響,實屬「非戰之罪」。踏入最後衝刺階段,唔少龍頭內房股已經達標,唔再帶頭減價促銷,對雅居樂年尾繼續推嘅項目銷售價格有正面支持。

城鎮化惠及房屋需求

至於政策風險方面,Prof. J相信新領導層仍以穩定發展為大方向,唔會推出重大嘅房產政策。至於宏調措施行咗咁耐,雖然中央唔會話全面廢除限購令咁激,但地方層面或會有微調。加上中央落實城鎮化推進,將有利開拓大眾化市場嘅房屋需求。

雅居樂係其中一間主攻大眾化市場嘅內房股,Prof. J認為呢類內房企業將受惠於城鎮化,因佢哋有充裕土儲,而且喺提供大規模經濟適用房上有豐富經驗。雖然雅居樂舊年同今年新購地皮唔多,市場擔心明年未必有足夠靈活度,按市況推出唔同檔次嘅樓盤,對明年銷情或有負面影響。

不過,Prof. J認為雅居樂依家嘅地皮屬於靚地段,例如喺衞星城市同主要城市嘅周邊地區,擁有完善基礎設施連接兩地,能夠配合推動城鎮化嘅發展步伐。喺追落後情況下,雅居樂隨時會跑出。繼續追蹤,出發!

香港大學電子金融服務榮譽助理教授 徐燦傑