近年多棲發展嘅「詠春賓卡」冼國林似乎愈來愈醉心電影業。除咗話喺佛山搞個「夢工場」之外，最近仲話要喺珠海搞間電影院，乜內地電影真係有咁火咩？
近年冼國林似乎對內地電影業衷心地「趨之若鶩」，不斷有新嘅生意諗頭。佢旗下嘅創業板公司國藝（08228），喺佛山投資14億元人民幣，搞個「西樵山夢工場」影城之後，近日又話要同一間內地公司，合作喺珠海搞番間戲院，規模都唔細o架。據講，間戲院會有8個院，總共可以坐到730幾人，國藝仲打算由間戲院提供穩定嘅現金流添。
看官可能心入面不禁問一句，內地電影業真係咁有「火」？咁就梗係啦，話晒電影業都係「十二五」規劃鼓勵項目，而且冼師傅食住條水又識搞「噱頭」。
冼師傅啱啱至喺萬聖節時，喺「夢工場」搞咗個Party，見無乜宣傳都有幾千人捧場；即刻就諗住聖誕節「添食」，搵埋旗下歌手、藝人及模特組合，齊齊去「夢工場」香港街開P，但入場費就盛惠120元人民幣。