港交所（00388）大拿拿斥資30億元大搞「領航星」技術革新計劃，呢個已經成為港交所上下最關心嘅大project之一，唔知係咪「朝思暮想」嘅緣故，今年港交所周年晚會派對嘅主題竟然係「領航星」，搞手亦都真係太愛公司喇，連玩都記掛住公司！港交所行政總裁李小加知道員工對公司咁有歸屬感，明年加人工會唔會鬆手啲呢吓？
聖誕假期下個禮拜就到，港交所一年一度嘅聯歡亦會喺聽日（19日）於會展舉行。Party每年都有一個特定主題，記得以前就試過懷舊、牛仔等主題，因為聯歡會都設有一個最佳裝扮獎，員工都會按住主題喺衣着上花心思。但今年主題係「領航星」，點樣裝扮，真係考起人！
記得李小加今年中介紹「領航星」計劃時，一身IT look出場，連領呔都唔打，員工或者可以參考吓，但點樣突圍而出，絲絲都想知！
係人都知，港交所近年開口埋口都係講人民幣國際化商機，咁唔知明年會唔會用「人民幣」做主題呢？