為咗迎戰強積金半自由行，受託人想盡辦法開拓客源，辛苦到不得了，早排中銀保誠行政總裁陳禹昌（Thomas）就去咗釜山，一於自由行，小休幾日再作戰！
絲絲記得，Thomas以前放假多數去日本，不過自從日本舊年發生地震及海嘯，佢就唔係好敢去，聽講佢最近迷上南韓，雖然言語不通，但Thomas抱住大無畏嘅精神，話去就去！
Thomas仲自爆鍾情自由行，佢話發現坊間嘅旅遊書好少介紹釜山，所以出發前好畀心機做功課，實行上網搵齊資料先出發，連搭地鐵要1,100元韓圜，用T-MONEY卡會着數啲，搭完地鐵再搭巴士有轉乘優惠都check清楚，真係犀利！絲絲心諗，如果第時強積金真係有全自由行，打工仔真係要學Thomas咁，出發前做好功課啦！
今次去咗幾日，Thomas發現南韓嘅發展一日千里，見到地鐵支線圖四通八達，真心覺得amazing，佢仲推薦絲絲下次再去釜山，可以行吓「金井山」添，睇嚟聖誕節真係要飛一轉釜山先得！