被喻為工業股殼王嘅高振順，今年成功將亞洲電信媒體重組成瑞東集團（00376），瑞東旗下嘅瑞東金融，啱啱仲攞埋證監會嘅資產管理牌照，Johnson（高氏洋名）大呻香港市場好難做，但絲絲見佢哋埋晒班，當中仲有外資投行高層，又有嚟自證監會嘅舊人，佢自己又親自招呼內地大款，擺好晒個陣，又點會難到Johnson呢？
Johnson話，香港市場好難做，瑞東嘅角色係以香港做橋樑，幫內地大款傾海外嘅資產購併，佢哋嘅海外客包括澳洲、新加坡等亞太區客，傾嘅資產就包括礦產同能源等。亦都會幫國企進行業務重組。
Johnson重申，佢最欣賞係當年嘅百富勤，希望做到具區域性規模，不過佢笑住補充，話一定要做得精細同穩陣，以免重蹈百記嘅覆轍。
佢搵嚟兩位外資投行高層坐鎮，瑞東董事總經理兼行政總裁伯樂，同副主席兼董事總經理博雅都嚟自投行Cantor Fitzgerald HK Capital Markets，伯樂係股票銷售交易部聯席主管，博雅就係Cantor創辦人，專長股票、衍生工具、定息工具、外匯、企業融資同投資銀行，仲有企業融資部主管麥若航就嚟自香港證監會，係前收購及合併委員會副主席。
Johnson話，海外同香港生意及監管由佢哋負責，而內地大款就梗係由佢親身出馬，至於佢千金高穎欣，雖然做緊中國風電（00182）嘅執董，不過都會幫到瑞東，事關佢嘅網絡都係內地能源業老總，可以帶到好多生意，同風電互惠互利。啱啱國開行旗下國開國際（01062）宣布全購國際投資基金Gateway，作價成20億元，就係由瑞東主理。
余詩韻