雅天妮（00789）主席夫妻間嘅爭拗實在耐人尋味，前晚終於嚟咗個了斷，創辦人兼大股東謝超群將自己大部分股份轉讓晒出來，不過可能外界覺得公司內部管理仍然好混亂啦，尋日雅天妮復牌之後，股價就大瀉逾一成，公司市值就咁唔見咗超過5,500萬元，而原本身家多咗一截嘅葉英琴，身家即刻縮晒水，以15%股權計數，一日就唔見咗800幾萬蚊！
早兩三個月，葉英琴單方面申請離婚，仲掌握埋個管理大權。點知事件峰迴路轉，謝超群竟然「空降」自己個細佬謝海洲落嚟做公司主席，仲轉讓咗29%股份畀謝海洲，等佢成為最大股東，最大嘅話事人！
有老友話畀絲絲聽，謝海洲原本喺公司冇任何職位，話就話佢都係飾品業內人，但始終對雅天妮一知半解，肯定對公司前景帶來不太明朗因素，覺得成件事仲有手尾跟，所以大家要拭目以待咁喎！