絲絲講場：fb營運總監捐走43萬股
美國唔少大型科技公司為善不甘後人，順道提升吓企業形象嘛，社交網站「一哥」facebook都唔例外，喺美國證交會（SEC）資料度見到佢嘅營運總監桑德伯格上個月捐咗接近43萬股出嚟，相當於1,180萬美元（約9,204萬港元）o架！絲絲心諗，桑德伯格似係見到股價跌到低殘，捐咗去冇眼睇。
SEC又冇提到桑德伯格啲股份捐咗去邊，按理應該唔係捐畀親屬或者係家族信託基金，因為要公開嘅，外界估計佢可能捐咗去佢坐board嘅婦女組織。
微軟Google獎勵創新
仲有兩家科企巨人話推出新嘅慈善活動，首先Google搞咗個「全球影響獎項」計劃，首次撥出2,300萬美金，畀7個組織，協助佢哋利用創新科技嚟「改變世界」。
而微軟就舉行咗個社會創新峰會，鼓勵學生搞搞新意思回饋社會，並撥咗300萬美金作為呢個「創新盃」嘅獎金。